Tusi-d u tɛedda mamek a teḍra ass amezwaru sima tedderḍeq deg ammas n lɛafit s lhimṛan-nnes ay yerɣin s yeɣsan n imeɣṛaṣen imezwura ald ineggura ; aked ma qqimen yyiḍ dren asmekti s wul yetcur d iɣed yeṣṣuḍ-d fell-as uɛeǧǧaj n lexdeɛ si teɣmeṛt d ljehl si teɣmeṛt iḍ.
Tafsut tetwasemma taberkant beṣṣeḥ bab n leɛqel yettaqqal-it d tamellalt temlel n tfukt n wass neɣ ti-n n ugur deg ul n usallas, d abrid reẓmen-t d ɣil deg imer ma tennid d maziɣ ad c-yečč nḥas, neɣ di Lumbaz d Lberwagiyya tcin yeḥṛuṛen aɣṛum d aberkan.
Tafsut d axxam yetwabna ad yeɛmer u ad yeggɛmer ; ad sersen di-s tisurta n wa ad d-yegguren. Ssas-nnes tidet yetwaseḥqen di txumat n zik n zik d uberber n umezruy si ljed n ljed. Iqendaṣen-nnes werzaw ɣef lɛadalt yettulemẓen s ukelleḥ d umelḥes ; qli s ɣer wa ay yiḥekmen, qli s ɣer wa yetwaḥkmen ald yufa wehrur iman-nnes isergel, iqendel, ameslay-nnes yettuɣem akkes tiktiwin yettalin, ay yihuggan deg ẓuṛan id n yidem yeḥman. Taɣemmaṛt-nnes d tugdudt yettuzuzren deg ujenna am lḥeb d ukerfa ; ferzɛen deg unnar i yijuraf d ssus, akkes wa yufin abrid deg cal yeɣmi, yekker-d ma ur yeqqur-ca, iṣaf iwella d lhicer i dduban bu sen iḍaṛṛen.
Tafsut d awal kem n inumak a teffer, azal-nsen snent ayet bab n wazal, yyidin ur yetwassinen, ur yetwassin maɣef a mmuten. Tamaziɣt d sser n izerfan n wemdan ; argaz, tamzṭṭut, d tmudri ayef tetwasek tmudri, d yil azeddag i wa yeffuden yella u werɛad irezzu ad yesew tilelli d aman. Rẓem zmam qra-t d isekkilen twamrun deg iḍ d wass s tiwdi, s tufra si tiṭṭawin n lbiɛat d cceryat di ssuq iwella duṛu yif tirrugza yessefsin ṛṛuman d nnif-nsen, iɛṛaben d ccan-nsen. Ixellaṣen n tesreft n isuggasen ahen ɣer yya ay yiweɛɛan taneffut ɣef teftilt n lḥeq yetwandlen s ifassen n yeḥbiben-yeɣrimen yettemseɛṣagen ɣef ugaluz n lemɛalim n « Wall Street » d imeslmen n ddulaṛ d ddinaṛ, yecfa weḥbib n Rebbi -ɛalayhi ṣṣalaṭ wa ssalam- ay yennan fell-asen d arebṛub n weɣlan n lqeṛn rbataɛec.
Kkren yudan kerzen, mejren newwar n udečča, yewweḍ-d udečča u yessur id n imal d yiwal, wa ay yemnaden yemnad lerhaḍ d lebha, wa yeddeṛɣlen icelqem asennan. Ruḥ a zman rni a zman, yetɣima kan wa ay yeḥlan, d wa yetwabnan ɣef laman. Tanewwaṛt tetɣima d tanewwaṛt, u twejmeyyet ɣer ayet bab-nnes d tamzirt n usennan.
Yunes Aɣuggali
