Yezmer Murakuc ad yesnewjew Akerwas Omaḍal en 2026?
Murakuc yettemsizwar řexxu aked kṛaḍ en tmura ɣef wi ɣa yesnewjwen Akerwas Omaḍal en useggʷas en 2026. Kṛaḍ a en tmura zi Amirika Tagafayt munent deg yijen usatul jar-asent: Amirika, Kanada ed Miksiku.
Zeg useggʷas en 1990 Murakuc yettarem ad yesnewjew Akerwas Omaḍal. Wenni en 1994 tiwey as et Amirika, wenni en 1998 tekkes as et Fṛansa, wenni en 2002 iruḥ ɣer Yapan ed Kurya en Wenẓol, akerwas en 2006 yettwagg deg Uliman, wenni en 2010 di Tefriqt en Wenẓol, aha wenni en 2014 di Bṛaẓil. Akerwas en 2018 ad yili di Rusya. Akerwas en 2022 ad yili di Qaṭar.
Imira, Murakuc yexs ad yili d-tamurt Tafriqant tiss snat ay ɣa yesnewjwen Akerwas Omaḍal awarni Tefriqt en Wenẓol (2010).
Maca ma Murakuc yella deg weswir en Tefriqt en Wenẓol niɣ en Miksiku di tdamsa ed teskiwt taddawt? Uhu. Yiggʷej iten aṭṭas.
Deg umerdul en teskiwt taddalant am yisuyas ed wannaren imeqqṛanen en tcamma aha deg umerdul osiweḍ unbiz (imagtaren, iṭobisen en tendint, ibriden) ed yizugaz ed tazdugi en yiɣeṛman Murakuc yella sadu Miksiku ed Tefriqt en Wenẓol es waṭṭas, nnehřa ma nessiweř xef Amirika ed Kanada.
Murakuc ɣilad ila sḍis isuyas imeqqṛanen en tcamma (Anfa, Eṛṛbaṭ, Fas, Ṭanja, Agadir, Meṛṛakec) iy yezmaren ad dey-sen irarent 48 en tlubbayin timuranin timaḍlanin timenyugar nsent en tneggura en Ukerwas Omaḍal. FIFA tettettar mraw-ed-ijjen isuyas imeqqṛanen es wudrus. Isuyas yellan di Murakuc dɣi simant nsen usren (ḥwajen) takennawt ed weɛdař es yimelyaṛen en dollar.
Yuccel as i Murakuc ad yeska semmus niɣ sḍis nniḍen isuyas imeqqṛanen en tcamma oḍar es yimelyaṛen en dollar aha yuccel as ad yeɛdel inni ɣer-s yellan es yimelyaṛen yaḍnin en dollar.
Manis dd-ɣa yawey Murakuc marra ettmenyat a? Ad dd-yeṛḍel zi beṛṛa? Ad yerni di tewsiwin (eḍḍariba) ɣef weɣref ameẓloḍ?
Akeṛwas a Omaḍal yessaggʷad ad yent Murakuc sadu yijen wedrar en omeṛwas es yimalyaṛen en dollar di simraw niɣ ugar iseggusa dd-yegguren. Ad yeqqim weɣref Amurakucan yeẓẓal (yettxellaṣ) dey-s di tmerwin iseggusa dd-yettasen es tidi nnes ed yidammen ines ed tudert ines!
Manaya yettas-dd deg yijen wakud ay deg llant tegrawlawin ed yiɣewwiɣen iɣeṛmanen iɣerfanen en yimeẓlaḍ ed yimettwattun yexsen tawuri (eřxedmet) ed tzeddiɣt ed waman di Elḥusima ed Jṛada ed Zagura ed mani nniḍen.
Anamur Amurakucan (Ameɣrabi) ila inezgi ad yessesten (ad yesseqsa): Mayemmi ɣa nessukel (ad nḍeyyeɛ) iqariḍen ed yidrimen nneɣ es yimelyaṛen en dollar ɣef yisuyas en tcamma oḍar aha neccin wer nufi tawuri (eřxedmet), wer nufi tazeddiɣt aha wer ɣer-neɣ asganfu (seppitar) ed tesdawit deg yiɣeṛman nneɣ?
Murakuc yus-dd di tfesna tiss 123t deg usudes en Tmura Imunen en tneflit talsant en 2015. Murakuc yuser (yeḥwaj) aṭṭas iɣerbazen, isganfuten (iseppitaren), tizeddiɣin tidamsanin ed yibriden di temnaḍin nnes yettwattun di Ugafa am di Arrif, di wegmoḍ am di Jṛada ed wenẓol ogmiḍ am di Zagura.
Murakuc wer yelli d-tamurt zeg “Omaḍal Amezwaru” (zund Amirika, Kanada, Aliman, Yapan…) niɣ zi tdamsiwin en “Omaḍal Wiss Sin” (Rusya, Tafriqt en Wenẓol, Bṛazil, Miksiku, Čina…). Murakuc d-tamurt zeg “Omaḍal Wiss Kṛaḍ” am Dzayer, am Tunes, am Nijirya ed Miṣra.
Es umenzayan, Murakuc izemmer ad yesnewjew Akerwas Omaḍal en 2026 maca man asnewjew? Aha es man atig?
Murakuc wer izemmer ad yesnewjew Akerwas Omaḍal deg weswir en tmura tinabɣurin (am Amirika, Aliman, Bṛiṭanya, Fṛansa, Yapan…). Murakuc yeccoṛ es yimeẓlaḍ ed yiɣeṛman en uqezdir ed tzubayin ed tgufsa (elfasad). Asnewjew en Murakuc ad yili amecnaw niɣ sadu weswir en wesnewjew en Bṛazil 2014 niɣ asnewjew en Tefriqt en Wenẓol di 2010. Manaya yella minzi Murakuc d-tamurt tameẓloḍt en Omaḍal Wiss Kṛaḍ, tiskiwt taddawt nnes d-tamennusrut, azyen ameqqṛan en yibriden nnes nnuffyen (nnuqqben) es yibgayen, tadamsa nnes d-tamelkukt aṭṭas, iɣeṛman nnes wer lin tiskiwt taddawt tadasilant tudwist, aha igendiden (imelyunen) en yimezdaɣ nnes tteddaren di tamara ed weẓlaḍ.
Mayen ɣa ggen yiwdan a es Ukerwas Omaḍal? Mayen d-asen dd-ɣa yawey?
Ad zey-sen yawey ujar en mayen d-asen dd-ɣa yawey.
Taɣawsa taneẓmayt akk: Atig en wesnewjew en Ukerwas Omaḍal di Murakuc (malla wcin as et) ad yili d-amaẓḍay aṭṭas ɣef weɛrur en Murakuc ed weɛrur en tarwa nnes.
Mubarik Belqasem
tussna@gmail.com