Xemsa jwilya , U mda ay ydder U BulɛiD wern n tuṛt
ɛeṭleɣ lmeṛṛet-aya ɣef tiɛad n xemsa jwilya baca ad ǧeɣ luheṛ i lɛid ameẓyan bla čecwic , u lliɣ ad mruɣ ɣef xemsa jwilya tict tun-t yudan , nettat d xemsa jwilya n leɣruz , mbeṣṣeḥ qarent ca timɣaṛin kul teɛṭila fi-ha xira , aged ma d arnay ay-terna ẓaẓt u tewwa-ya ljalt u samiɣ aṣeṛɛuf u niɣ taḥya sbayer n tugduda tadzirit , u am lmuwaṭen lmitali refdeɣ-d amraw ad d-ktiɣ yect seg meɣraṣen n tmurt :aged ma yella d lɣerz , maci ɣef leɛmeṛ-nes ad utlayeɣ niɣ d amezru-nes ad ktiɣ.
Aherrar-inu lmeṛṛet-aya ɣef U Bulɛid u mda ay yedder wern n tuṛt . ass-a yudan kul tutlayen ɣef war n wawras , xali cawi qaren ca imujahden n zik , baba-s n tegrawla , argaz ay yucin lemlaḥim-nes i tirrugza ad tbeggeṣ i-sen…u yudan ay yeqṛan azwel ma yella ca way iqeṛṛan di tmurt n icawiyyen , twalem ad iṛuḥ lbal-nes ɣer tmrzgunt n imeɣṛaṣen ad d-wellan smant-aya n Ṭaheṛ Weṭṭaṛ niɣ ad ijaḥ uxemmem-nsen u ad ten-tawi uheǧheǧ u ad arjin imeshal n imira ṭuṛqen di suq niɣ Dzayer d tamsunt ɣef tmurt niɣ ….u niɣ . mbeṣṣeḥ way yeẓṛin tilawt n umezru mammek ad teggur ad yssen U Bulɛid wern n tuṛt matta ad yili meskin , u ur d-qareɣ ṛebba ad t-yeṛḥem xaṭeṛ iṛeḥem-it seg-a ad t-yewwi zik . u mebla ma ad wen-igeɣ am lfilmat n Hičkuk ad wen-d-iniɣ matta ay yella U Bulɛid ad yili mda ay yedder wern n tuṛt .yella ɣef umezwaru ad yili si lɛṣkeṛ n Fṛanṣa u ad n-dɛawden taqṣidt-nes di lgirra n Lalman , yella ad yili d bayuɛ tesserg-it-id Fṛanṣa si Lkudya u tiga lfilm n trewla-nes baca ad yut tuṛt , ylla aged ad yili infiṣali ɛamil li-lmuamra lmasunu-imbiryali-ṣuhyu-ṣafawi-uzbakistniyya , fṛunku-cawi du uṣul zwaviyya , yella… u yella ad yili , bla yaqejjem yella ya ad yili di lḥebs yetṛaja ad t-ṭuṛqen ya d aruggal di Swiṣṛa , yella U Bulɛid ad yili d zamul n uɣuṛṛu maci d zamul n tirrugza , u wa ma nesla i-s zdat ma ad yemmet u ad igen lquṛan di tilifizyun , ɣef wa ilaq ad d-nini lḥemdu li-llah yemmut zik baca ad yeqqim isem-nes d azedday u deg jenna aged ma azalen a ɣef yemmut , ya muten id n xemsa jwilya ya twaɛefsen s iṛanjasen ɛefsen di tmurt-aya wern n tuṛt .
U ɣef uneggaru ad wen-d-iniɣ la-ɛad ad tinim ṛebba ad yeṛḥem cuhada, xaṭeṛ ṛeḥmet-nes tehdef-d fella-sen ass n tmettant-nsen madam a tella zdat n xemsa jwilya . init ṛebba ad yeṛḥem tamurt-aya bla ma ad temmet niɣ ad teč tarwa-nes ay yeqqimen : ṛebba ad tyeṛḥem u ad ɣen-yeṛḥem u ad iwesseɛ fella-neɣ ajmaɛin .
Kamel Tiḥmamin
