TARJAYT N YIḌ DEG AMMAS N UNEBDU – WILLIAM SHAKESPEARE*

YEXF AMEZWARU:

Asayes 1: TAƔṚEMT N DDUQ, DI ATHINA :

Ad yadef Theseus, Hippolyta, Philostrate  d yiḍ gara-nsen

Theseus: Imir-a, a Hippolyta tmibhayt, ila yimer n islan-neɣ yettazay-d; qli n tlata n wussan ad ṣiwḍen gur d atrar, Ah, beṣṣeḥ mamek a taqqaleɣ gur-aya la yetmetta s weḥbaw! Ha-t tneq deg-i a xse-ɣ, am tikent neɣ d taǧǧalt, s tuddimt a senbacen seg ayen yeǧǧ-asen wergaz.

Hippolyta: Tlata n wussan ila ad zeḥzḥen iman-nsen deg iḍan, ma d tlata n yiḍan ila ad ṣefḍen yimer ɣer teɣmeṛt, ɣer di-n; gur yetbeggeṣen am uneccab n weẓref, ad yetna d aɛessas n talwit-neɣ deg jenwan.

Theseus: Philostrate , ḍren awelleh n ilemẓiyen n Athina lherj, sukid tarca n uqejjem yeččuṛen tezdeg d terzeggi, ṛṛa ljalt n lɣec i tnedlin; ssuḥemt tawraɣt ur telli n tikli-neɣ.

Philostrate  yerg.

Hippolyta, s ugestur-inu uci-ɣ ameɛruf ɣef ul-nnem, ur wi-ɣ achal-nnem kkes sima snirfeɣ-cem. Ma tqedd-aya u recleɣ-cem, ila ad deffereɣ abrid iḍ; abrid n tgelda, , tgawant, d usemḍi n zehwat.

EGEUS, HERMIA, LYSANDER d DEMETRIUS udefen-d

Egeus: Tezmert i cek a Theseus, aglid-neɣ amecnuɛ.

Theseus: Tanemmirt, a Egeus yeḥlan. Yella-ca n wetrar a d-hewwid id-k?

Egeus: Usi-ɣ-d ɣucceɣ xirellah, s wul ay yeqnen ɣef teɣmeṛt n yelli Hermia—tazza-d a Demetrius- Ay aglid-inu, argaz-a yuc-ay-d awal ad t-yercel –  tazza-d a Lysander – ma d wa, ay aglid aɛziz, yuker ul n yelli s tqerrabin n ljawi. Cek, cek a Lysander as- yesekken icewwiqen, u temserḍalem tuɣac n tayri. Cek as-iɣennan seddu n tziri, ɣer tmasext n ṭṭaq-nnes tuɣac n wechal, s tgerzi yeṣfan. Tukrid-as timallatin n yexf s teḍfirin n uzaw-nnek, ibrimen, lheddet, tarzeggi, timeqqunin n newwar, cra n ser yersen ɣef temẓi-nnek. S tzellayin turzid ɣef ul n yelli, aydin n ṛẓant a tesɛa, tetna d asezwer n yexf. Ay aglid ameqran, ur netnekkar-ca seg-ya kkes ma tuc-id awal-nnek d aneggaru ad tercel Demetrius. Ur twelliɣ kan ɣer lqanun n ayet bab n Athina, u sima d tsa-inu, tezmer kan ɣef sent n tɣawsiwin; ad tercel a xseɣ, neɣ ad temmet.

Theseus:  Matta tennid a Hermia? Sers baba-m am rebbi-nnem, d netta d sebbet n wayen tesɛi-d uk. Hih, cem ɣer-s ma hennid d taḍellust n uderyis, d netta a t-iṣawben, ma yexs yeǧǧi-t, ma yexs yessefsi-t. Rni, Demetrius d argaz yeḥlan.

Hermia: Aked d Lysander ur yeǧǧi-ca.

Theseus: D tidet, ula d netta yenthela di-m, awid kan wi-n yerna-t s teɣmeṛt n baba-m.

Hermia: Matta xseɣ i baba ad yeẓr ɣer-s s tiṭṭawin-inu.

Theseus: Yella ilaq i tiṭṭawin-nnem ad qnent ɣer tneẓrit-nnes.

Hermia: Suref-aya nezzeh a Mass, ur ẓriɣ-ca matta n uɣil ay yečin tabɣest-a ad d-tutlay ha-mma, ur ẓri-ɣ-ca daɣ matta ay-ḍran ma sawiɣ amm-a di lmejmeɛ am lmejmeɛ-nnek. Awid kan ad k-uceɣ ameɛruf ay-tinid matta ad ay-tsawa-m ma ur wwiɣ-ca Demetrius.

Theseus: Tamettant neɣ ad tebbid udem-nnem ɣef yudan.Yetban-ay-d ẓer nezzeh matta texsed, u ad tsawid ljam i yiman-nnem ay yizaɣen. Ẓer ɣer leɛmer-nnem, ur tucid d tameẓyant, qqel ɣer iman-nnem ma tzemred ad tirḍeḍ tajbibt n tecrifin – ma tucid i wawal n baba-m s tɣeṛḍin –  Ad tesɛeddid ayen a m-yeqqimen d ussan deg tallast n taddart, teqqureḍ, tetẓalliḍ i trebbit n ugur taṣemmaṭṭ. D tidet irbbiyen ttictan wa ytteṭfen deg iman-nnes bac ad qqiment d tiɛezriyyin tmudri n sent uk, beṣṣeḥ iẓem n newwar yessarad s leɣẓer yyi-n i ẓeṛṛen dunnit s wudem yict. Ad d-tegmi, ad d-tedder u ad d-terci s-neg n usennan n tiɛɛuzra.

Hermia: Ammi-n, ay aglid, xseɣ ad gmiɣ, ad dreɣ u ad rciɣ mamek a tennid, aked ad d-sekkeɣ tiɛɛuzra-inu i wergaz temmexs-it tarca-inu.

Theseus: Xemmem di-s di qli-aya n wussan ald ad yali lehlal atrar, u ad yawweḍ ass n tiddukla, mani ad sserseɣ tuččin jar-ay-inu d wayen a sɛiɣ. Ad tawid s wawal n baba-m, ad tawid Demetrius, neɣ ad d-teǧǧalled ɣef tsejjat n trebbit Diana, texxamt n tiɛɛuzra ha ad t-zedɣed ɣer yiffiḍ.

Demetrius: Eǧǧ ɣad-i fella-m a Hermia yebhan, u ttu, a Lysander, matta tetṛajid d lmektub yetwamra i neč.

Lysander: Ur tesɛid kan leqḍer n baba-s, ma d neč d tayri-nnes a yes-s, i mala rcel baba-s!

Egeus: Tḍesseḍ a Lysander? D tidet yesɛa leqder-inu, beṣṣeḥ s leqder-aya ad t-redmeɣ s wagel-inu. U sima d agel-inu ad as-uceɣ lḥeq kkul, ad yawi ay yexs.

Lysander: Ay aglid, aked neč teqneɣ ɣer twacult n leqḍer am netta, u leqḍer-inu di tmetti ur yedrus-ca ɣef matta yella netta, u ttictiɣ Hermia kter-nnes. Agel a ɣer-i am wa yellan ɣer-s ma yella ur tifiɣ-ca. Beṣṣeḥ ɣef wa uk ayes tzuxen yudan, Hermia tettict-aya neč. Mala maɣef ad susmeɣ ɣef azref-inu? Yerni ad iniɣ cra n wawal amek yella u qadda n Demetrius, ha-t yurzi ɣef yelli-s n Nidar, ti-n yettusemman Hilina, yuc-as awal ichel-it, isa tuḍu di-s. Ha-t-in imir-a nekkin-t tetluleḥ fell-as u netta da yetmeḍran, ur nezmir-ca ad nuɛa ɣer-s, u nettat temmut fell-as, yerni teɛbed-it am ṛebbi-nnes.

Theseus: Ad awen-d-iniɣ sliɣ qli n uherrar ɣef temsalt-a, u lli-ɣ ad utlayeɣ gara n Demetrius fell-as, beṣṣeḥ ttuɣ, ẓwiɣ gara lemmayer-inu. Ased a Demetrius, u cek a Egeus, ɣer-i awal i kenwi kan, ma d cem a Hermia tuzyint, ay yilaqen ad tessersed ifriwen-nnem s-tma n baba-m, neɣ ad cem-yeṭṭef uṣaḍuf n Athina, yellan ur nezmir ad t-neglef, s-dat n wa ad temted neɣ ad tedred lebda d taɛezrit … ayya-d a Hippolyta. Matta acem-yuɣen ha-mma tlebted? Ula d cek a Demetrius d Egeus, ha-t tella qli n temsalt n yislan-nnes xseɣ ad tcewcem fell-as, yerni ad utlayeɣ ɣer-wen qli.

Egeus: Ad ac-ndeffer, ay aglid, bla yawal

Rgen uk, kkes Lysander d Hermia.

Lysander: Matta a cem-yuɣen amm-a a taḥbibt ? Udem-nnem yuṛeɣ, u newwar yellan di leḥnak-nnem yerci lih lih?

Hermia: Awelli d tametna ay yiceḥḥen, amm-a ula d leɣẓer n imeṭṭawen ad d-ihuggan si tiṭṭaw-inu ur ahen-tekfi-ca.

Lysander: Ah a yul-inu! Ayen a sliɣ d wayen a qriɣ d tineffusin n umezruy ufiɣ belli abrid n tayri yeččur d tisuwwan d isennanen. Tban-ay-d yella qli n lexṣuṣ jar-atneɣ di temɛict.

Hermia: Maḍella d sebbet ad yeǧǧen yeḥbiben msefraqen!

Lysander: Awelli ujren beɛḍ-asen s labas.

Hermia: Maḍella d tkatert ay yibeṭṭan ilemẓiyyen!

Lysander: I mala temsalt ha-t deg fassen n imeddukal.

Hermia: Maḍellahi s tumriyet yettaǧǧan yict ad yaqqel ɣer matta ẓeṛṛen yudan!

Lysander: Aked ma tella tayri d tmuxsi, xirella n lhuṛat mani achal yella d sebbet n umenɣi, n tmettant, neɣ n wuḍan. Wa iweɛɛa-t d aḥesri am imesli, d amsebrid am lexyal, yedrus am tmarjit, yečala am urmig deg usellas n yiḍ. S temɣawla-aya.

Hermia: Ma yella abrid n tidet n tayri yeččur d tisuwwan d isennanen, d wa ay yettuḥetmen fell-as. Mala ilaq, di luɛeṛ, ad nɛekkez alawi, sima tannumi n luɛer tetsama-d tayri, am nettat am tiktiwin, turjayin, asukti, imeṭṭawen d wa yettixsa bunadem aqellil uk.

Lysander: D awal i ṣeḥḥen … sel-ay-d a Hermia .. ɣer-i ɛemti d tameṛkanṭit, ur ɣer-s-ca n drari. Axxam-nnes yebɛed tkli n was s-ya, nettat tesrus-aya am memmi-s awḥid, di-n, a taḥnint, nezmer ad nessili islan-neɣ. amkan-in ytrag i wufus n lqanun n Athina. Ma tellid tettictid-ay d ṣṣeḥ, rwel seg uxxam n baba-m adečča deg iḍ, ad iliɣ tṛajiɣ di-m di tiẓgi ur yebɛiden-ca ɣef taɣṛemt kan s qli, ɣad-i deg umkan mani a cem-mlaleɣ gara n Hilina s-dat n tfaska n mayyu.

Hermia: Ad k-ǧǧalleɣ, ay aḥbib-inu, s uneccab ameqran n Kupid, d wa ay yesɛa si-sen mi-yexfawen iwṛaɣen. Rni ad k-ǧǧalleɣ s tmelsayt n tedbirin n Vinus. D yal n tɣawsa yessemlalen yeḥbiben u tessegmay tayri-nsen, d lɛafit yeččin taglidt n Qarṭaj, sima yekker userdasi di teflukt-nnes u ibeɛd-as. D lɛahed a tfeyyan akkas yergazen, yyi-n ay yifen matta tebbin lxalat d lɛuhud ɣef iman-nsent. Ad k-ǧǧalleɣ s waya uk, adečča ad ay-tafed deg umkan a tennid.

Lysander: Ili ɣer wawal-nnem a taḥbibt … Qqel! Ha-tt-in Hilina teggur-d s-yun.

Tudef-d Hilina.

Hermia: Azul fella-m a Hilina tuzyint, mani a teggured?

Hilina: Teqqared tuzyint? Ur qqar-ca ha-mm-a, d tuzyint ayef yetmetta Demetrius d cem. Matta a tḍebreḍ a tameṭṭut yebhan! Iṭṭawin-nnem am itran n ujenna. Tgerzi-nnem tif imesli n waḍu ma yuta deg tesbulin n yirden ma ṣafent. Ah mda yella i tumreyyet n bunadem aḍan i nettɛen, ila ad ay-tessentɛed zzin-nnem a tamelḥant! Ɣer di-n imejji-inu ad yerẓem i umeslay-nnem, tiṭṭ-inu ad temleḥ am ta nnem, ma d iles-inu ad yebreḥ s wayen a ɣer-m d tgerzi. Ah mda tella dimmet deg ufus-inu, ila ad m-tesekkeɣ d taɣrimt i Demetrius ad ay-t-tuced! Selmed-aya mamek ad baneɣ u ad d-flaleɣ. Selmed-aya tnaẓurt a cem-yeǧǧin teteṛṛid tarca n Demetrius.

Hermia: Leɛmeṛ ḍṣiɣ-as deg udem, u netta akkas yendeḍ deg-i.

Hilina: Matta ay-yuɣen taḍṣa-inu ad telmed seg uɣucci-nnem.

Hermia: serwayeɣ-t d cetmat, irenn-aya s tayri-nnes

Hilina: Mani yuɛa dmam-inu s-dat n cetmat-nnem?

Hermia: Kul ma rewleɣ fell-as, irenni yettendiḍ deg-i

Hilina: Ma d neč ma xseɣ-t ugar, yetmexs-aya meṛtin.

Hermia: Maci d neč ad irefden tibbuhla-nnes, neɣ si cra n umerrig a xedemɣ a d-husa.

Hilina: Tahusi-nnem ay yilaqen ad terfed ta, aked d amerrig yexḍa seg-i a d-yusa.

Hermia: Ur tɣeffes-ca iman-nnem. Ur yeqqim ad yeẓer udem-inu. Neč d Lysander ila ad nerwel si tɣeṛma. S-dat n wa ad ters tiṭṭ-inu ɣef Lysander, tella Atina d tamsunt di tiṭṭ-inu. Cra n uɣil yellan deg tayri-inu, tamsunt tetna-d d jahennama?!

Lysander: Ad am-nini matta neffer. Adečča tameddit, ald ad tessers tfukt seg ifulan-nnes n weẓref s-neg n waman, ud ad teṛxa s-neg n yijji lerhaḍ-nnes n iẓerfawen. Ald ad teffer tallest lejaṛṛat n yeḥbiben imesserben. D t-in d yimer ila ad nerg seg tmasxiwin n Athina.

Hermia: Ad mlileɣ aḥbib-inu Lysander di tiẓgi. Tiẓgi-in, yaxi xirella a ṭṣeɣ nečč id-k ɣef ussu n newwar, nketta-d ayen yellan deg ulawen-neɣ, u yal yict yeqqar ay yeffer i yum-as. Di-n ad nekkes iṭṭawin-neɣ ɣef Athina, ad nerzu ɣef imeddukal d itraren,d terbaɛin yellan ur nessin. Ɣim deg talwit a temeddukelt n temẓi, ur tettu-ca ẓall-aneɣ, u sarameɣ ad taḍuḍ deg ul n Demetrius. Ma d cek a Lysander ur tettu-ca timlilit n wadečča

Terg.

Lysander: Temmut a Hermia … di lahna a Hilina. Matta a xseɣ ad yeɛceq di-m Demetrius lɛuḍ a tɛecqed di-s.

Yerg.

Hilina: Wa msefraqen yudan di tumert-nsen! Imezdaɣ n Athina uk ẓerrin-aya d zzin am Hermia, matta fell-as ma ur yeẓri-ca Demetrius matta ẓeṛṛen. Ur nessin matta snen yyiḍ uk? Ila ẓeṛṛeɣ-t yetmerrag sima ay yebḥer di tiṭṭawin-nnes, u yudan tmerragen-t fella sima ẓrin-aya ḥareɣ di lemmayer-nnes. Tayri tezmer ad tuɛa tiɣawsiwin yeqquren, d ḍḍelf, ur sɛin azal, d tɣawsiwin ay yiqedden u jemlen lebha d zzin. Tayri s yiman ad t-ẓer yexḍa s tiṭṭaw. Ɣef ta  Kupid tefriwin, ucin-as tugnit n uderɣal, meqqen n tiṭṭawin. Ula d alli, di tayri, tetxuṣṣ-it temɛint n ṛṛay, tifriwin bla yeẓri kan d abecleg. Qqaren tayri am ldufan, axaṭer ur yezmir ad yefren wa ay yifuḥen si wa yeḥlan. Mamek a serkusen drari ald ad d-tiraren, aked d tayri akkas tessur gara n tserkas di yal amkan. S-dat n wa ad yeẓr Hermia, Demetrius yessired-aya s tmetna n tɣawsiwin sima yeqqar yetticta-ay kan neč. Beṣṣeḥ s lḥumman a tessent di-s Hermia, aydin n tmetna teẓwa deg ugzay. Ad iliɣ ɣer-s luqqa u ad siniɣ Hermia texs ad terwel. Bla tutlayt, adečča ad t-ideffer ɣer tiẓgi. Aked ma ɛyiɣ si teṣmeḍ-nnes d ucennef fella, ila ad yezha u ad ay-yesnummer. Ma d neč ad ay-yekfa di-s a taqqaleɣ abrid uk, ald ad yeẓwa u ad yetna.

Terg.

Yunes Aɣuggali

* Azwel aḥeqqani netta: “Mid-summer Night’s Dream”.