S tchawith : Amma ttilin isekwan n tmazight i yigurdan ( Amur wis sen: asguri)

Bettu n usekwan

Yuma ɣef umsuddes neɣ ɣef uselmad ad yegur netta d amezwaru, ad yili din zdat wa ad d-awḍen dderri yekkin deg usekwan bac ad yelken belli allalen ukk llan u qedden. Ad yeddes hazeqqa manek itt-yexs. Ad isuff imer-din s dderri-nes s taḍsa bac ad asen-temmukes hiwdi yellan hettedja dderri ad refden hamuɣli ur hehli c fell-as, ma yebḍu fell-asen. Manek nnumen id n qli n yiselmaden deg ugherbaz yellan ur ttutcen c azal i yinelmaden. hasarut-nek deg uqeddec-a d awal yeḥlan d wezmummeg deg wudmawen-nsen bac ad ak-fedken ulawen-nsen u ad igen di-k taflest.

Hazeqqa n usekwan hexḍa d asmil deg uɣerbaz, eǧ dderri ad ḥessen, ad snen amkan-a yellan d atrar fell-asen, ad fernen mani ad qqimen u id n menhu, rrbeɛ n tsaɛt hamezwarut at nsen nehni, abettu n usekwan yuma ad yili s tmexsayt d wassaɣ yeḥlan id n umsuddes, ad ac-ctan i ggifen hiwdi ssi-k

 D heyya d isurifen i gḍeffreɣ deg usguri n usekwan:

Seg wayen i xedmegh id n yiqeddacen deg ugherbaz yuzan deg yila id n dderri i yekkin deg yisekwan n tmaziɣt i gigiɣ ssawḍeɣ ɣer terrayt ad debreɣ ɣef wi ggexsen ad yig armud seg tewsit-a ad tt-yeḍfer, ad hent-segzleɣ deg yisurifen-a isemmusiyen :

Tagnit n ummussen : Sumata dderri ttilin mmusnen zdat n way, ad rnin deg ummussen-a aled ad adfen u ad fernen imukan-nesn, deg tegnit-aya ad mmusnen dderri gi jar-asen d yid n uselmad. bettugh dima s ussissen s yiman-inu i dderri, imer-din ad sneɣ dderri, kul icet ad yutlay aggexs manek i ggexs f yiman-nes, way ur yettawi c labas n wakud.

Ad smiren dderri asissen s yiman-nsen ad asen-d-utlayeɣ ɣef usentel n usekwan d matta ad yilin di-s d irmuda, imuta ɣef tmaziɣt d tutlayt n tmaziɣt d ugemmay-nes

Tagnit n ulmad : Aled ad ẓṛen dderri tumayt n usekwan, ad hen-ǧeɣ ad twelhan idi bac ad ssegziɣ hamsirt s terrayt hussnant, ad hen-sselmdeɣ deg ayen yuman ad t-ssnen deg usekwan ilmend n yiswi i ggesrseɣ f umezwaru bla ma ad ttuɣ belli manek yella wi yettutlayen hmaziɣt, yella wi tt-yifehmen berk u yella daɣen wi ur itt-yifehmen c xlas u yqum ad ilin id-k dderri yekkin zdat n way deg yisekwan n tmaziɣt neɣ lemdent deg uɣerbaz neɣ deg wexxam.

Tagnit n usnas : Aled ad ttemmir hemsirt, ad hen-ǧeɣ ad steɛfun qli, ad igeɣ aktazal i dderri s yiluɣma imatuten ghef temsirt ad kkin di-sen ukk ict ict, bac ad ẓṛeɣ matta fehmen, deg tegnit-aya ad yili unmaggi iɛerrem d umzagez jar n yal icet d yal agraw. Anmaggi id n yiseqsiyen-nsen d abaɣuṛ xater asnas d wa d tamlilt-nes

Tagnit n yirar : Maɣef as-nniɣ tagnit n yirar xater ur hellic am ulmad, mani ttilin dderri rekḥen u sɣaden bac ad gemmnen ɣef tussniwin n temsirt d usnas-nsen, day ad ilin d ilelliyen, yal icet neɣ yal agraw ɣer-s hikti deg yixef-nes ad yessenɛt iss matta yelmed s tira neɣ usuneɣ…

Irar yebḍa ɣef sen n yiswiren :

– Amezwaru d amadwan kul icet ad d-yemsel hɣawsa-nes ad yari u ad isuneɣ di-s aggexs

– Irar ad yili d agrawi ad kkin deg urmud d tarbaɛt am ccna

Tagnit n terrazt  : S deffer n uqeddec-a ukk yuma ad asen-tuced hɣwsa hẓiḍ u ya lukan d aceqquf n ccikula neɣ d tiḥelwatin bac ad zhan qli u aled ad asen-tiged zzgaz am taɣect yeḥlan, asungh yehlan, agraw yeddsen, aqeddac ylemden … Besseḥ la tqemmeḥ ak d ict

Tamawin :

Ssarameɣ ad iliɣ wḍegh ɣer ccwek n usentel-a ukk mani ɛerḍeɣ ad uceɣ tamawin-inu himanin bac ad taget lfayyt w ad nberrem qli n yiɛerriqen i gzerreɣ, d way aɣef xseɣ imsuddsen ad asen-akin u ur geṭṭun c di-sen. Ad rniɣ qli n tmawin deg tneqqidin-a:

– Yexyar asettef n tigida ɣef talɣa n usekkil « U » bac ad tili taywalt n umsuddes id n iqddecen d tasridt, haqimit haqburt deg yizerteṭṭa i ggnnum deg usmil hessenqas haywalt id uselmad u ad sxilen iman-nsen deg usmil n uɣerbaz u way ad d-iwella d uzdir fell-asen deg urmud n usekwan

– Yuma f umsuddes ur yetettu c tanfaleyyin usnemmer n dderri yal hikelt ad d-ucen di-s hiririt neɣ ad kkin deg urmud u ladgha deg yirmuda n yirar bac ad igen haflest deg yiman-nsen u ad yerni wemzagez f ulmad di jar-asen.

– Aled ad yili usekwan yemmug deg tegnit mani ttilin yudan ɛermen am (ixef n useggas) ad xsen akk ad ssnen matta i hettegged neɣ bac ad igen hiwlifin Id-sen, day yuma ur hettedjid ak d icet ad d-yaf bac ur yetɛeyyel c iqeddacen d tikli n temsirt, rni dderri ad meɛren u ad asen-d-yesxil usin-d i yiswi n ufsar i yudan ad aqqlen di-sen

– Aled ad yaweḍ akud n wučči, netc ttectiɣ dderri ad čen amekli-nsen din di hzeqqa n usekwan, bac ad qqimen dima qqnen ɣer wadeg d uqeddec n usekwan rni ur yetruḥa c labas n lweqt xater ɣer-sen hict n tsa3t i wmekli.

– Deg usekwan ad ttafed yal ict seg dderri neɣ yal agraw yetlaɣ bac ad ak-yessenɛt matta yiga neɣ bac ad c-iseqsa, ɣer-k ad ttelthid u ad tettud matta yḍerran syun. Yuma ad ttaghed lḥitt i dderri ukk u ladɣa imezzyanen ssi-sen maɣef ad refden hǝawsa ad hen-tebbi neɣ ad hen-tḍurr. U ma xsen ad rgen ad steɛfun lazem ad yili id-sen ict d ameqqran u hessned-t mliḥ.

– F uneggaru sima ad ttesmirem hignatin ukk n usekwan, eǧ dderri ad ac-ɛawnen deg usezdeg n tzeqqa si hferka i gigin, neč ur ttectič c ad ẓeyyẓeɣ labas dderri di hɣawsa-ya, tteǧiɣ-hen ad xedmen s tlelli ladɣa tagnit n yirar.

Hamkerḍa hasmasekwant

Bac ad yili usewjed n usekwan yeshel u bla uguren yeḥla ad theyyid zdat hamkerḍa di-s qli n tmusniwin ara ac-iɛawnen. Ad d-uceɣ amedya f usekwan i gigiɣ hikelt haneggarut yellan yeddes id n yirmuda n tiddukla tadelsant Tamusni di teɣremt n Zoui, di Mascula (hawilayt n Xencla) id n Yiflu Adelsan Acawi Inumiden.com ass n 27/02/2016 yellan amma:

(Yuqqa.)

Ḥeṛṛat Sumiya : Taselmadt n Tmaziγt
Aγerbaz alemmas n Bellefḍel Bayzid
lḥamma – Maskula (xencla)