Amezgun amanḍan n Tbatent itran n ṭaḍṣa deg tfaṣka
Matta ad ṣṣeḍṣayen ikrusen d inuɣan jar n yudan ɣef tɣawsiwin d tmusal tiṣemmaḍin ay yeṣṣeṛẓagen tameddurt .
Deg ass wis-kuz ɣef usaye n tfaṣka , ulin tarwa n umezgun amanḍan n Tbatent s tceqquft n “wesli d teslit” ay isuqel mass Ɛli Jbaṛa seg uḍṛiṣ n Unṭwan Čixuf , u yessili-t-id mass Ṣaleḥ Bu-bir .
Asli d teslit d ṭaḍṣa ɣef tilawt tmiṛẓagt mani rennant lfalat tiɣawsiwin d tmusal timessasin , tilamṣaḍin acehhal .mbeṣṣeḥ acehhal irenna-tent ɣef uneggaru ak-ass , yeɛni taceqquft-aya mammek tḍeṣ ɣef tilawt ay yettemɛaṛaḍen i tayri .tayri trenna-t u tṛeẓ tisergal tilamṣaḍin tayri tetuč iman n amdanan i yudan .
Mass Ṣaleḥ Bu-Bir ay yiraren d Ɛemmi Ssaɛid , baba-s n Ṛhuda niɣ tazeffant ay yufraren massa Ɛica Mesɛudi yucca-neɣ , tlawda d ṛṛaḥet d ṭaḍṣa s tcawit-neɣ , tcawit n temɣaṛin .feṛḥen inijiwen u ksen ɣef ulawen-nsen mammek ay ilaq lḥal , rgen deg tmeddit n wass-din am wa ay ijeṛḍen inezgam deg anu mebla yabuḍ .
Tarbaɛt n umezgun amanḍan n Tbatent tella di tezrigt-aya d yitri n taḍṣa s weḍiṣ ay yeqqimen yedder aged ma uzlen wussan u ɛeddan isuggasen , u ad teqqim tarbaɛt-aya d udem seg udmawen n umezgun ay yesfawayen annar n ydles d tẓuṛi n tmurt .
Kamel Tiḥmamin
