Ḥalazum , tawellit ɣer umezgun s tgida n tmusni
Deg ass wis-kuz seg tedyanin n tfaṣka , uɛan-d tarwa n tiddukla , ṣṣewwet tazenẓaṛit -Tbatent asirem deg umezgun adziri s umatta , maci way yettutlayen s tmaziɣt beṛk .
Yessili memmis n usayes ay yetwasnen , azeffan amuqṛan mass Leḥsen Ciba taceqquft n “ḥalazum” seg uḍṛiṣ n Ṭalal Neṣṛ Ddin s weṭṭaf ay yufraren deg lugan n umezgun , mɣir yesmektaneɣ s umezgun n uḥeṛṛec ay yutin s iẓuṛan deg yidles n tmurt seg Weld Ɛebd Ṛreḥman Kaki ɣer umeɣṛaṣ n tiktiwin mass Ɛebd Lqader Ɛellula .
Ikemmel wesnulfu n inaẓuṛen ay yemlilen seg tmurt n wawras kul s udiwenni s tcawit seg teɣmeṛt n Tseryant , mani bdan isekkiren n tceqquft s tfelwit d takuligṛafit yeqqim usezmel-nes deg tedyanin d imeẓṛiyyen a ɣen-yesmektin s Braxt , u yerni uẓawan aṛẓay n wefṣil wis-kuz s wallalen n icawiyyen am ubendir d teqṣebt s ufus n inaẓuṛen deg-in deg zeqqa mebla ma ad nettu tfawet d yirar beṛṛa n usayes ay yessukin inijiwen seg tnafa n teqṣidt .
Atrar ay yernin deg azal n lxedmet n mass Lesḥen Ciba , yella d asidef n umewweṛ ɣef ṛmel deg tsinugṛafit .
Mass Leḥsen Ciba d terbaɛt-nes xedmen tɣawsa ad yeqqimen deg umezru n umezgun adziri , u sergen amezgun amaziɣ seg sbayer tiqbuṛin ɣer sbayer n umezgun , s tmusni d wusnulfu ay yessezwaɣen udem u refden tfaṣka ɣer ṣṛa ay yilaqen I yedles amaziɣ .
Kamel Tiḥmamin
